แด่คุณพ่อ(ผญา)

……………………….

ชีวิตของพ่อนั้นได้ฟันฝ่ามาหลาย

เทิงค้าขายเฮ็ดนา ตั้งโรงสีเลื่อยไม้

ไปทำงานรับจ้าง แบกปูนเป็นช่าง

คันแม่นมีผู้จ้าง พอเฮ็ดได้สู่งาน

มีผู้วานผู้เว้า ไปซ่อยเขาเมิดสู่แห่ง

เงินค่าแฮงได้บ่ได้ คันซอยได้ไปซอยเขา

เอาแฮงกายเข่าสู่ แลกเงินทองของใช้จ่าย

เหนื่อยส่ำใดบ่จ่มบ่เว้า บ่เซาสู้เรื่องงาน

บ่ขี่คร้านเวียกงานเฮ็ดสู่อย่าง

หาทางฝึกลูกเต้า ส่งลูกเข้าไปฮ่ำเฮียน

ฝึกให้เพียรบ่คร้าน การงานเวียกหน้าที่

เป็นคนดีใช้ได้ ไทบ้านให้อยู่นำ

ชีวิตของพ่อนั้น เป็นแบบอย่างทางดี

ห้ลูกเดินนำหลัง ถึงที่หมายคือฝันไว้

ต่อนี้ไปบ่เห็นหน้าพ่อของเฮาคือแต่เก่า

เว้านำเฮาสู่มื้อต่อจากนี้บ่ได้เห็น

ไปนำเวรกรรมสร้างไผมันพระเพิ่นว่า

จักสิดีชั่วฮ้ายบ่เห็นฮู้แล้วแต่กรรม

ขอกรรมดีพ่อเคยสร้างทานมัยพ่อเคยก่อ

บุญพ่อแม่พี่น้องกินทานสร้างให้หลั่งโฮม

เป็นพลังดลให่ พ่อไปดีมีสุขยิ่ง

สู่สวรรค์คิ้งนิ้ง วิมานฟ้าบ่อนสำบาย

คันแม่นตายได้เกิดพ้อขอเป็นลูกเป็นหลาน

อยู่นำกันนานดนได้ตอบแทนพระคุณท่าน

อันหมู่พาลภัยฮ้ายอันตรายให้หนีห่าง

มีความสุขอยู่สร้างฮักแพงมั่นบ่จืดจาง พ่อเอย

ด้วยความรักและอาลัยยิ่ง

จาก ภรรยาลูกหลานและญาติพี่น้องสู่คน

………………. 

ขอขอบคุณบทกลอนจาก

www.porkru.com | ผลงานบทพิธีกร กลอน ผญา ภูมิปัญญาอีสานของพ่อครูวิทิต ไชยวงศ์คต